Romans 4
Avalaamu Mumulaxu Tanu Noxou Lataua La sou Lataua Mumoxo'u Lexe Anu Itema Mulapu
1Avalaamu ne anu 'ilusunenge mo anu itema iouvilesisi aloxo nenge 'osi. Aloxo ne la sou nenge tavikala a loxovaa no anu maulixu? 2Avalaamu mumulinu 'ilixo laixe la sou no anu 'ilixonesi, la Lataua mumoxo'u lexe anu itema mulapu. Lexe aloxo ne la sou anu u'itinu ualasou no anu xaixai e anu mu'oxonu ne. Ia no iou Lataua la anu muxali itema mulapu no anu vote'i ane ne uasi. 3 aXo vaikala muai no nano no anu Lavuku Tavuna teinu noxou Lataua muvikala a loxovaa? Anu muvikala aloxo 'o, “Avalaamu mumulaxu tanu noxou Lataua, la sou Lataua mumoxo'u lexe anu itema mulapu.”4Aloxo itema e uxaxai xe ilotonu la anu loxo mii milosou vitanisi uasi, anu muno'u ne sou lakolisou xaixai noxou. 5Xo anu aloxo itema e u'oxo'oxonu xaixai laixe uasi sou uxali itema ulapu no iou Lataua, ia mumuxaxu tanu noxou Lataua lexe Lataua umoxo'a ta mitema sou susu lexe ane'i ta mitema milapu, mo umulaxu tanu kalumo, la sou Lataua umoxo'u lexe anu itema mulapu. 6No anu vaivaikala noxou Deviti la anu muvikala kalumo lexe ta mitema ane imulimulinu 'ili'ilixo lailaixe sou ixali ilapu no iou Lataua ne ane'isisi i'osa uasi. Ane'i ane i'oxo'oxonu 'ili'ilixo laixe uasi kalumo ne i'osa. 7 bMo muvikala kalumo aloxo 'o,
Ane'i ane Lataua muxiunu tumalou no anu susu noxi'a,
xe muxexeenu susu noxi'a la ane'i i'osa.
8Mo itema 'ena'ei ane Lataua tanu vulusiou susu noxou ne, la anu u'osa.
9La sou loxovaa, ane'i ane xooxoo mungasi'asi i'osa? Uasi, ane'i ane xooxoo ungasi'a uasi si i'osa? Nenge tevikala lexe, “Avalaamu mumuxaxu tanusi la sou Lataua mumoxo'u lexe anu itema mulapu.” 10Ioxe, la sou Lataua mumoxo'u Avalaamu lexe anu itema mulapu ne a talu? No mine xooxoo mungasou, o uasi no mine xooxoo ungasou uao? Uasi. Tei no mine xooxoo ungasou Avalaamu uao, la Lataua mumoxo'u lexe anu itema mulapu. 11 cXo anu xooxoo ungasou uao, ia anu mumuxaxu tanu noxou Lataua tei, la sou no anu 'ilixo sou xooxoo mungasou ne Lataua mulosou loxo sosovo lexe anu itema mulapu. Aloxo ne la sou ta mitema ane xooxoo ungasi'a uasi ia mimuxaxu tane'i noxou Lataua ne anu Avalaamu ta 'ilusunu, mo Lataua umoxo'a lexe ane'i ta mitema mulapu. 12Mo anu 'ilusune'i ane'i ane xooxoo mungasi'a kalumo, mo no anu 'ilixo sou xooxoo mungasi'asi uasi. Ia ane'i xooxoo mungasi'a xe mimulinu 'ili'ilixo noxou 'ilusunenge Avalaamu mo mimuxaxu tane'i noxou Lataua, loxo Avalaamu mu'oxonu tei no mine xooxoo ungasou uao.
Lataua Muxavutalanu Vaikalau E Musakiinu
13 dLataua musakiinu vaikala noxou Avalaamu ilo'a ta 'ilu'ilusunu lexe ulosi'a lialia ukalusi. Lataua mu'oxonu aloxo ne xo Avalaamu mumulinu lapuloto laixesi uasi, Lataua mu'oxonu aloxo ne xo anu mumuxaxu tanu xe anu itema mulapu. 14 eLa sou lexe ane'i ane mimulinu lapuloto laixe ne ane'isisi ino'u mimii ukalusi e Lataua musakiinu vaikalasou sou ulosinge ne, la 'ilixo sou tamuxaxu tanenge ne anu uxali loxo mii vitanisi. Mo vaivaikala e Lataua musakiinu ne, anu uxali loxo vaikala vitanisi kalumo. 15 fXo lapuloto uxolu ia tamulinu laixe uasi, la anu u'oxonu Lataua la'iaxu. Ia no mine lapuloto uxolu uasi, la sou nenge talavusou lexe itema ususu uasi. 16 gLa sou no anu alauna noxou Lataua la mumasaxau Avalaamu misevile mo ta 'ilu'ilusunu e ixali ili'i la sou Anu musakiinu vaikala noxou ne. Aloxo ne la sou no anu 'ilixo sou imulaxu tane'isi la mimii e Lataua musakiinu vaikalasou ne Anu ulosi'a Avalaamu ta 'ilu'ilusunu. Anu ulosi'a ane'i ane mimulinu lapuloto laixesi uasi, ulosi'a ane'i ane mimuxaxu tane'i kalumo loxo Avalaamu. Nenge mukalusi ne 'ilusunenge ane Avalaamu ne. 17 hAloxo vaikala muxolu no nano no anu Lavuku Tavuna teinu noxou Lataua muvikala aloxo 'o, “Eni e'oxoneni nexali 'ilusune'i ta mitema no tuatuala no lia 'o mukalusi.” Mo anu muxali loxo anu 'ilusunenge no iou Lataua. Anu mumuxaxu tanu noxou Lataua e ulavusou utulusi'a ta mitema misoisoli la imauli, xe Lataua e uvikalasi la mimii e uxali mo tamaisou uasi ne anu uxali.18 iAvalaamu ulavusou lexe Lataua u'oxonu mimii ne uxali manina a loxovaa uasi. Ia anu muloopalasi, la sou loopala noxou ne muxali maninasou lexe anu 'ilusune'i ta mitema no lialia 'o mukalusi. Anu aloxo Lataua muvikalanu ne, lexe “Ta 'ili'iline, mo ta 'ilu'ilusuneni xe ta xaixasine maasi la ixali tavu'alo manina.” 19 jAvalaamu taulele'exu sexasisi sou uxali loxo itemaxu ta'uve (100) mo tanu mumulinu maulixu la anu itema tila mo vasimolu ne usoisoli. Mo anu mulavusou lexe Sela kalumo imomomo sou ipalaa la uasi. Ia mimii ne utaloxolixu uasi, anu mumuxaxu tanu noxou Lataua pekia'u. 20Xo Lataua musakiinu vaikala lexe u'oxonu mimii ne la sou Avalaamu muxavutala no anu la mumuxaxu tanu pekia'u manina no anu vaivaikala ne la tanu usasalo uasi. Anu mumuxaxu tanu noxou Lataua la sou no anu muxamuxaxu tanu noxou ne mu'oxonu pekia'u mo mu'itinu Lataua ualasou sou mii ma'ia ane Lataua u'oxonu noxou. 21Mo xavutalau mutulu pekia'u lexe Lataua umomomo sou u'oxonu mimii e anu musakiinu vaikalasou ne uxali manina. 22 kTava'u aloxo ne la sou Lataua mumoxo'u lexe anu itema mulapu. 23Aloxo ne la sou vaikala vile muxolu no nano no anu Lavuku Tavuna teinu noxou Lataua muvikala aloxo 'o, “Lataua mumoxo'u lexe anu itema mulapu.” Vaikala ane ne sou Avalaamusi uasi. 24Vaikala e mikaukavunu muxolu ne anu singe kalumo. Xo nenge temuxaxu tanenge noxou Lataua lexe Anu mutulusou Tila noxinge Iesu no anu soli, la sou Lataua mumoxo'inge lexe nenge ta mitema telapu. 25 lLataua mukalanu Iesu mulu'e no lia 'o la ta mitema mivau musoli sou muxexeenu susu noxinge. Ia Lataua mutulusou no anu soli la mumauli la, aloxo ne la sou Lataua mumoxo'inge lexe nenge ta mitema telapu.
Copyright information for
ATA